O orzamento do Consorcio de Turismo Ribeira Sacra para a anualidade 2024 quedou aprobado este sábado 4 de maio, tras o pleno celebrado no Concello de Manzaneda, por un importe de 255.000 euros e cunha incorporación de remanentes de un 1.321.816,71 euros correspondentes fundamentalmente ao primeiro dos Plan de Sostibilidade Turística.
“Quedaría pendente de incorporar o importe do segundo Plan de Sostibilidade (2.000.000 €) que se asinará nas vindeiras semanas e o proxecto MOVES SINGULARES II se finalmente se consigue completar o orzamento para a súa execución”, comentan tamén dende o Consorcio.
CONTRATACIÓN DUN PLAN DE FORMACIÓN, APOIO Á INNOVACIÓN E RECOÑECEMENTO DE ACCIÓNS SOSTIBLES
Tamén se aprobaron os pregos para a contratación, por procedemento aberto, dun Plan de formación e boas prácticas, apoio a proxectos innovadores e recoñecemento de accións turísticas sostibles por importe de 30.000 euros. Esta acción enmárcase no Plan de Sostibilidade Turística 2020-2025.
Os servizos a contratar teñen por obxecto identificar as necesidades de formación do xeodestino, asesoramento, deseño de accións formativas e de boas prácticas, promover xornadas de sensibilización, poñer en marcha un plan de formación específico para o xeodestino, ademais de deseñar unha liña de apoio a proxectos innovadores e de confeccionar as bases para unha convocatoria de premios a proxectos turísticos sostibles.
De acordo ao documento técnico do Plan de Sostibilidade Turística, entre os obxectivos para alcanzar coa execución do presente contrato están:
-Proporcionar ao sector as ferramentas necesarias para ofrecer un servizo de calidade e acorde ás medidas de seguridade e hixiene vixentes en cada momento.
-Xerar oportunidades de emprego, que contribúan a atraer e fixar poboación no territorio, garantindo a conservación da paisaxe, así como de usos e tradicións.
-Sensibilizar á poboación local sobre a importancia do Valor Universal Extraordinario de Ribeira Sacra e sobre as oportunidades do turismo sostible para o territorio.
Este servizo comezará por unha diagnose da oferta formativa existente para o sector turístico que permita cubrir áreas que os profesionais consideran necesarias e para as que non exsite oferta. Inclúese tamén unha importante bolsa de horas de titorías para atender necesidades concretas e individualizadas, e contemplarase a premisa de coordinar as dinámicas cos Polos de Emprendemento, GDR, e calquera entidade que promova accións formativas vencelladas ao sector.
SESIÓN PLENARIA EN MANZANEDA
O Presidente do Consorcio, Luis Guitián, propuxo celebrar esta sesión en Manzaneda por dous motivos. Seguir coñecendo os concellos que se integraron hai xa un ano e apoiar e dar visibilidade á Capitalidade Española da Montaña que ostentan durante este 2024 os concellos da Pobra de Trives, Chandrexa de Queixa, San Xoán de Río e Manzaneda. É a primeira vez que recae este distintivo en Galicia e en catro concellos (antes nomeábase un único concello por ano). Ponse en valor así o compromiso e interese pola preservación ambiental, así como pola loita contra o despoboamento rural con apostas no campo do turismo e actividades ao aire libre.
O Presidente engadía: “Este ano temos outro motivo de celebración moi sinalado para o territorio: no mes de agosto cúmprense 900 anos do escrito fundacional do mosteiro no que se recolle por primeira vez o termo “Rivoira Sacrata”. En coordinación cos Concellos, Deputación Provincial e Xunta de Galicia, promoveremos algunhas actividades con motivo dese aniversario.”