Alertados por uns veciños, dende o Colectivo Patrimonio dos Ancares acaban de comunicar á Dirección Xeral do Patrimonio da Xunta de Galicia e ao Concello de Sarria o mal estado en que se atopa a emblemática Ponte da Áspera, paso secular dos peregrinos para salvar o río Pequeno ou Celeiro no seu camiño cara Santiago de Compostela. De orixe baixomedieval do século XV (algúns investigadores din que do século XIII, e incluso de orixe romana), foi reformada no século XVIII.