O Xeoparque Mundial Montañas do Courel contará cunha achega de 25.000 € que lle chegan tras asinar un acordo de colaboración o seu presidente, Roberto Castro González, e o presidente da Deputación de Lugo, José Tomé Roca. Con esa partida financiaranse accións realizadas para promocionar o territorio e difundir a súa riqueza natural.

“Este territorio é un verdadeiro museo xeolóxico ao aire libre, cunha variedade de formacións, minerais, estruturas tectónicas e formas que o fan unha xoia xeolóxica única na provincia e un destino moi atractivo para expertos e afeccionados á natureza”, destacou o mandatario provincial. Sinalou, ademais, que o acordo axuda ás Montañas do Courel a promocionarse de acordo co modelo de turismo polo que aposta tamén a institución provincial: de proximidade, de experiencias, de calidade e sostible.

José Tomé: “Este territorio é un verdadeiro museo xeolóxico ao aire libre… unha xoia xeolóxica única na provincia…”

Concretamente, o acordo entre a Deputación de Lugo e o Xeoparque Montañas do Courel serviu para colaborar na Semana Europea dos Xeoparques; tamén para organizar a visita de campo das Xornadas da Sociedade Española de Paleontoloxía; para a realización de actividades do Outono Xeolóxico; para realizar un estudo espeleolóxico da sima Aradelas; e outro sobre as bolboretas deste territorio.

Este mes de outubro estanse a desenvolver as actividades do Outono Xeolóxico, entre as que destaca a xeoruta desde Os Alvaredos a Os Novais (19 de outubro), dirixidas a todos os públicos e interpretada por especialistas en xeoloxía e arte seguindo o Camiño de Inverno; e outra actividade para coñecer as covas do xeoparque, visitando galerías, salas e pozos na sima Aradelas situada ao norte das Montañas do Courel.