Este sábado 19 de outubro organizouse en Monforte, concretamente nas instalacións do Club Quixós e na contorna do Cabe, unha xornada matinal de concienciación co coidado do medio ambiente, a sostibilidade e a limpeza de contornas acuáticas. A promotora desta acción foi Mares Circulares, unha plataforma creada por Coca-Cola en España e Portugal que impulsa actividades para fomentar os valores devanditos.
En Galicia, esta xornada de concienciación e limpeza de ríos contou coa colaboración da Federación Galega de Piragüismo e nela participaron os seguintes clubs: Sociedade Deportiva As Xubias, Club Piragüismo Cambados, Piragüismo Rianxo, Illas Atlálticas, Club Náutico Castrelo de Miño e Club Quixós de Monforte.
PARTICIPACIÓN DO CLUB QUIXÓS
En Monforte, a limpeza do río Cabe e a súa contorna tivo como protagonista ao Club de Piragüismo Quixós, participando nos traballos un nutrido grupo de piragüistas xunto con algúns familiares.
Sobre as 10:30 h. da mañá comezaba, onde as instalacións do club, unha reunión previa cos monitores da plataforma Mares Circulares na que houbo unha charla divulgativa, de concienciación e de planificación dos traballos de limpeza. Ademais de material como luvas, paus con pinzas, bolsas, etc, tamén ofreceron bocatas, bebidas e unhas gorras de agasallo para os e as participantes.
A continuación, os traballos de limpeza desenvolvéronse no propio río e as súas beiras, coa recollida de residuos dende as piragüas dos/as voluntarios/as; e nas contornas, coa recollida realizada polos monitores de Mares Circulares e familiares dos deportistas do club.
Ao remate, cara as 13:30 h., reuníronse todos os residuos recuperados sumando enriba de 90 quilos de lixo. Entre todo o recollido, –sobre todo plásticos, toalliñas, latas, e vidros– había obxectos voluminosos como cadeiras e bloques de cemento.
MARES CIRCULARES
Trátase dunha iniciativa da marca Coca-Cola impulsada para combater os graves problemas medioambientais que acontecen nos mares e costas de todo o mundo.
Púxose en marcha no ano 2018, en España e Portugal, cun programa centrado na sostibilidade ambiental e co obxectivo de limpar as costas e os fondos mariños, sensibilizar á cidadanía e fomentar a economía circular. Tamén traballa apoiando solucións e tecnoloxías innovadoras para rematar co lixo que contamina os nosos recursos acuáticos.
Entre as accións que impulsan están a limpeza de praias e outras contornas acuáticas como ríos e encoros.
