En agosto deste ano a eurodeputada Lidia Senra e a deputada de En Marea no Parlamento Galego, Paula Verao denunciaban a situación na que se atopaba o Castro de Chavaga, no concello de Monforte. Despois dos lumes do 2017 executáronse na zona talas e retirouse madeira queimada. Estes traballos fixéronse con maquinaria pesada non respectando os camiños existentes nin os muros perimetrais que existen nas cotas do monte o que provocou desperfectos no castro e nos muros de pedra. Esta era a denuncia que acaba de confirmar o Servizo de Patrimonio Cultural da Xunta en Lugo.
En escrito remitido por Ana Carril Cuesta, Xefa de Servizo a Lidia Senra, recóllese que efectivamente se comprobou que houbo actuacións que afectan á area de protección integral e ao contorno de protección do castro da Coroa ou castro de Cabo en Chavaga. Engade ademais que estas labores non contan coa necesaria autorización da Consellería de Cultura. Tamén informa de que remitiu á Subdirección Xeral de Protección do Patrimonio Cultural, unha copia do expediente de denuncia, para se “consideran procedente iniciar os trámites para a incoación dun expediente sancionador aos presuntos responsables destes feitos”.
O Monte Castro conta cun xacemento catalogado (Castro da Coroa ou de Cabo), coa referencia GA27031013, adscrito á Idade do Ferro e reocupado na época sueva, e conformado por dúas plataformas circundadas por cadanseu terraplén. Ante a gravidade da situación denunciada e recoñecida, e tendo en conta que este 2018 é o Ano Europeo do Patrimonio Cultural, Lidia Senra pide unha solución efectiva para protexer este xacemento exixe que o expediente sancionador se abra canto antes.
Segundo a europarlamentaria é gravísimo que alguén seguindo os intereses da industria da madeira producira estes estragos, ignorando a Lei 5/2016 do 4 de maio, do patrimonio cultural de Galicia. Reclama que todas as Administracións velen pola conservación do patrimonio cultural e natural e que rematen este Ano Europeo do Patrimonio Cultural cun cambio efectivo nas políticas que non permitan nunca que os intereses da industria madeireira estean por riba patrimonio.
Ademais desta reclamación en favor do patrimonio, Lidia Senra e Paula Vázquez traballan para que non se planten eucaliptos neste distrito forestal. Explican que a Orde de 19 de Maio de 2014 de modelos silvícolas ou de xestión forestal, recolle que o eucalipto queda excluído do Distrito forestal VIII, Terra de Lemos. Na actualidade Senra e Verao impulsan a constitución dunha plataforma para defender os Distritos VII, VIII e IX da plantación de eucaliptos.
Segundo Paula Verao “Se apostamos polo Patrimonio en sentido amplo, hai que apostar por modelos produtivos que conserven a paisaxe tradicional e evitar a desorde territorial que impera na Galiza, buscando modelos agrarios sostibles, que fixen poboación no rural con empregos de calidade”.
