A Rede Española de Xeoparques Mundiais (REXM), na que están integrados os dous Xeoparques galegos –Xeoparque Cabo Ortegal e Montañas do Courel–, estará presente por segundo ano consecutivo na Feira Internacional de Turismo –FITUR 2025–, edición 45ª que se celebrará do 22 ao 26 de xaneiro. Poderá dar a coñecer os seus atractivos turísticos no stand que integra diferentes Xeoparques Mundiais (outros españois, portugueses e latinoamericanos), concretamente no Pavillón 7 a.19 de Ifema e nun espazo de 40 m2.
O espazo contará con tres mostradores onde ofrecer información, unha pantalla de gran formato, un photocall e un punto de encontro para profesionais do sector turístico, tanto do ámbito público como privado. Este despregue será posible grazas á colaboración da Axencia Española de Cooperación Internacional para o Desenvolvemento (AECID).
A cita para a apertura oficial do stand é o vindeiro mércores 22 de xaneiro ás 14:00 horas. No evento participarán Santiago Sierra, presidente do Comité Nacional Español de Xeoparques; Emmaline Rosado, coordinadora da Rede de Xeoparques de América Latina e o Caribe (GeoLAC); Artur Sá, representante do comité executivo da Rede Mundial de Xeoparques (GGN); e Karmah Salman, coordinadora da Rede Española de Xeoparques Mundiais (REXM). Asistirán as delegacións formadas por representantes políticos, técnicos e empresas do sector turístico dos 17 Xeoparques españois, así como tamén dun Xeoparque aspirante.
ACTIVIDADES E ACCIÓNS PROMOCIONAIS
No stand de Fitur 2025 os Xeoparques realizarán presentacións dos seus destinos e produtos turísticos e darán a coñecer as últimas novidades para que o público poida coñecer e explorar en fondura estes territorios, cada vez máis atractivos e accesibles. Tamén se presentará a 11ª Conferencia Internacional de Xeoparques Mundiais UNESCO que se celebrará en setembro de 2025 no Geoparque Kütralkura de Chile.
O Xeoparque Montañas do Courel fará a súa presentación o venres 24, día que aproveitará para amosar os seus recursos máis atractivos para un turismo de perfil alternativo, afastado da masificación e respectuoso co medio, en liña coa filosofía coa que a UNESCO creou a figura dos Xeoparques Mundiais. Aproveitando que o día anterior fará a súa presentación o outro Xeoparque galego, o de Cabo Ortegal, ambas delegacións aproveitarán o evento para ter unha reunión na que partillarán experiencias e inquedanzas e tentarán establecer liñas de actuación en común de cara ao futuro.
Os dous primeiros días de feira (22 e 23 de xaneiro) a mediodía haberá unha degustación de produtos locais dos Xeoparques ibéricos, con produtos de calidade como queixos, embutidos ou viños. Outra das actividades destacadas será o sorteo dunha experiencia turística para dúas persoas nun dos destinos da REXM, que inclúe dúas noites de aloxamento, unha actividade e unha degustación. O concurso estará aberto a todas e todos os visitantes do stand durante os días 25 e 26 de xaneiro.
DEZ ANOS DO NACEMENTO DA REDE DE XEOPARQUES MUNDIAIS DA UNESCO
Este ano fanse 10 años desde que a Asemblea Xeral da UNESCO ratificara a creación dos Xeoparques Mundiais da UNESCO.
A Rede de Xeoparques Mundiais da Unesco convidou aos xeoparques de América Latina a participar neste evento de referencia mundial que se converteu, na súa longa xeira, nun punto de encontro global clave para os e as profesionais do sector turístico. Os tres primeiros días a feira abre as súas portas exclusivamente a visitantes profesionais e durante a fin de semana tamén ao público xeral. Nesta edición de Fitur, os Xeoparques tamén estarán presentes de forma dixital a través das súas redes sociais. Para poder seguir todo o que acontece no stand e interaccionar pódese facer uso do portelo #geoparquesfitur25
