“Ruta das Minas de Vilarbacú”, así presenta Coureleando unha ruta que organiza para este sábado 22 de febreiro e que terá como guía ao Técnico deportivo e de Media Montaña, Guillermo Díaz Aira.
O punto de quedada será no Mesón Ferreiriño de Quiroga ás 9:30 h. e como material obrigatorio recoméndase o seguinte: botas de monte ou calzado de trail, bastóns, mochila pequena con algo de auga e de comer. Tamén roupa deportiva cómoda por capas. Para apuntarse facelo no teléfono 626 643 021 e o custe será de 15 € por persoa (pequenos/as de 10 a 15 anos que vaian cos pais, de balde).
A RUTA
Partirase da vella explotación da Mina de Vilarbacú e ascenderase ata a altura de 1.500 metros pasando preto das bocaminas e das ruínas dos edificios. No alto albiscarase o territorio do Xeoparque e montañas como Trevinca, Aquilianos, Ancares e, se o día o permite, incluso as Médulas. Chegando ao cordal principal, opcionalmente poderase subir ata o Pía Paxaro ou descender a través dunha paisaxe glaciar ata o comezo da ruta.
A ruta é circular, duns 9 quilómetros e de dificultade moderada camiñando por pistas e sendeiros amplos. O tempo máximo que se estima, con paradas, é de 5 horas.
AS MINAS DE VILARBACÚ
Estas minas foron de antimonio, sendo explotadas entre finais do século XIX (1896) e mediados do século XX (1958). O seu auxe produtivo foi durante as 2 guerras mundiais. Chegou a ter ata 86 traballadores e producir máis de 250 toneladas de material on picos de 400 na primeira Guerra Mundial. Tempo despois convertiuse nun campo de traballos forzados onde os presos abriron estradas e plantaron piñeiros ata o seu peche definitivo. Actualmente, toda a explotación está en ruínas.
