Dende o sindicato valoran en positivo o diálogo emprendido pola patronal de todos os sectores nos distintos concellos da zona sur pois en todos os centros de traballo houbo unha boa predisposición para cumprir coa implantación do rexistro da xornada. Tanto é así que negociouse cos delegados e coa representación sindical a sinatura de entrada e saída en ‘planilla papel’ mentres non se instalen outras tecnoloxías.

A Secretaría de Acción Sindical de CC.OO. cre que con esta medida “deuse un paso importante para acabar coa explotación laboral, con xornadas de 12 horas sen remuneración nin compensación con respectivos descansos”.

O sindicato refire que son coñecedores de casos ‘sangrantes’ de traballadores que realizaron máis de 860 horas nun ano que se corresponderían cun importe económico xerado e non retribuído de 8.000 euros e non se lle pagou nin unha soa hora extra. E non queda aí a cousa, segundo amplía o secretario, Mario Docasar, “despois de ir reclamar, de boas maneiras, esas horas extras, a resposta empresarial limitouse a derivar á persoa á xestoría para recoller a carta de despido”.

Casos como os anteriores non deben pasarse por alto segundo Docasar que afirma tamén que a nova medida do rexistro horario da xornada laboral permitirá reclamar as horas extras realizadas e non pagadas, en moitos casos baixo unha contratación a tempo parcial.