Co gallo do Día Mundial da Saúde Mental 2019, a asociación Albores organiza un acto de carácter público para achegarse á sociedade e dar a coñecer o seu importante labor.
Están convidados/as, entre outros/as, os medios de comunicación, os alcaldes da zona, os representantes dos partidos políticos e das asociacións monfortinas e as familias dos usuarios e usuarias.
No transcurso do mesmo, a Presidenta lerá un manifesto que abordará a problemática que supón o suicidio para a sociedade, tema no que se centra a OMS o vindeiro día 10, Día Mundial da Saúde Mental.
Este organismo internacional pon o foco nesta lacra social para a concienciación e sensibilización na prevención do suicidio, un problema de saúde pública que vai en aumento. Cada ano, preto de 800.000 persoas morren por esta causa sen contar as que o intentan. O suicidio non respecta idades e supón xa a segunda causa de morte entre os mozos e mozas entre 15 e 29 anos.
Despois do manifesto e parlamentos dalgunhas autoridades presentes, procederase a convocar o III Certame Fotoxénica-Mente. Ademáis, será a última oportunidade para ver a Exposicion de Fotografía Fotoxénica-Mente II. Pecharase o acto compartindo uns pinchos coas persoas asistentes.
