“Neste tren cabemos todxs” preséntase como unha plataforma cidadá formada por distintas organizacións, entidades, asociacións e persoas que xuntan forzas co obxectivo de defender o ferrocarril público na comarca de Lemos. Desde a plataforma á que se poden sumar todos os interesados lembran que o ferrocarril supuxo historicamente para Monforte un motor de desenvolvemento económico e social, se ben nas últimas décadas, se deu unha continua degradación nos servizos ferroviarios e no impulso económico que supón para a cidade do Cabe e a súa comarca.

Desde a plataforma culpan ás políticas neoliberais dos diferentes gobernos da Xunta e do Estado de cuestións como:

• Desaparición de servizos tanto de viaxeiros como de mercadorías, abandonando e desmantelando vías e peiraos e empeorando a oferta de transporte.
• Falta de persoal e de investimentos para o mantemento da infraestrutura o que orixina importantes riscos de seguridade e excesos nos tempos da viaxe.
• Envellecemento e diminución do persoal ferroviario coa conseguinte precarización do traballo e como consecuencia empeoramento do servizo e diminución da seguridade e da calidade.

Con estes antecedentes solicitan de modo urxente e inmediato:

• Substitución xeracional en todo o persoal ferroviario e aumento do persoal en Renfe e Adif, internalizando todas as tarefas externalizadas ao longo dos anos e cubrindo todas as baixas, tanto temporais por enfermidade como definitivas por xubilacións.
• Aumentar as frecuencias e servizos rexionais repondendo ás necesidades reais, en particular no traxecto Lugo-Monforte-Ourense-Vigo, con horarios que cubran as necesidades reais das persoas usuarias.
• Impermeabilización da liña e supresión dos pasos a nivel dentro do centro urbano de Monforte.
• Instalacións seguras para os viaxeiros na contorna da estación de Monforte coa instalación de ascensores que comuniquen as plataformas.