A presentación oficial da campaña, no salón de actos do Centro do Viño da Ribeira Sacra de Monforte, tivo como protagonistas ao presidente da Mesa pola Normalización Lingüística, Marcos Maceira, e ao responsable desta entidade na Comarca de Lemos e comarcas da contorna, Xosé Manuel Fernández.
Cunha asistencia dunhas 25 persoas, Marcos Maceira lembrou o traballo que realiza A Mesa para defender e garantir os dereitos lingüisticos das e dos galegofalantes, e Xosé Manuel explicou como naceu a inciativa da acción que se presentaba, ‘Fraseoloxía galega para pediatría’, e como será o seu desenvolvemento.
Entre o público estiveron catro das ilustradoras e ilustradores, concretamente, Iria e Dani de Estudio Gnomo –Pantón–, Estefanía Padullés –Paradela–, e Noelia Rodríguez –Montefurado–. creadores que interviron para trasladar a súa satisfacción por teren participado na campaña e polo traballo creativo dos e das súas compañeiras na elaboración dos deseños.
No transcurso do acto tamén se amosaron ao público asistente todos e cada un dos deseños, os 15 autocolantes con frases galegas que se entregarán aos servizos de pediatría. Este traballo comezará a vindeira semana, coa distribución nos ambulatorios dos concellos de Lugo sur para que os/as pediatras poidan xa ir entregando aos seus usuarios e usuarias ao remate da consulta.
