O Incio, como outras terras do interior de Galicia, teñen un abondoso patrimonio material e inmaterial que os identifica como pobo e que cómpre preservar e poñer en valor. Pero ademais teñen outro importante reto, recuperar poboación e dinamizar a vida social da contorna rural.

Tendo en conta este punto de partida, a principios deste 2022 nacía a Asociación Cultural As Cavarcas co obxectivo de “recuperar e preservar o noso, o que nos dá o carácter da Terra Brava que somos”, así se expresan no folleto informativo que teñen para dar a coñecer a entidade á veciñanza, e de dinamizar a vida social organizando actividades culturais e informativas de interese para a veciñanza.

“Recuperar e preservar o noso, o que nos dá o carácter da Terra Brava que somos”

Falamos co seu presidente, José Moscoso.

Que son As Cavarcas?

As cavarcas como termo, na nosa zona refírese a paredes que se facían nas sortes onde se sementaba (maiormente centeo). Estas paredes facíanse co fin de dividir ditas fincas e tamén era unha maneira de que cada vez que se traballaba a terra aproveitábanse as pedras que dela saian.

Conservase hoxe a toponimia nos lugares de varias parroquias noutrora dedicados a dito fin (riba das cavarcas, baixo as cavarcas, entre as cavarcas…).

Cando e con que obxectivos nace a asociación?

A Asociación Cultural As Cavarcas bota a andar na primavera do ano 2022 co fin de protexer e dar a coñecer o patrimonio cultural, natural e histórico  das diferentes zonas do Incio. Cremos que é necesario asociarse para programar actividades de recuperación e mantemento tanto do patrimonio material como inmaterial.

Falando de patrimonio, que opinades do traballo que está a facer o Concello do Incio para preservalo e poñelo en valor? 

Consideramos que non se está a facer todo que se debería para conservación e posta en valor do patrimonio natural: mantemento e aproveitamento de soutos, asesoramento veciñal… Limítanse máis ben a seguir as directrices da Xunta. E neste aspecto non parece que sexa suficiente. No que se refire ao patrimonio cultural e histórico temos moito que poñer en valor no noso concello (castros , mámoas, sendeiros de gran valor…). O traballo das institucións non é o axeitado baixo o noso punto de vista.

“No que se refire ao patrimonio cultural e histórico temos moito que poñer en valor no noso concello”

Cantos socios/socias forman parte xa das Cavarcas? 

Actualmente somos en torno a 30 soci@s. Esperando poder abrir a afiliación a todas aquelas persoas que desexen formar parte da asociación. Para elo temos fichas de afiliación a disposición. A cota anual fixada é de 12 euros por persoa ao ano para poder facer fronte aos gastos da asociación e axudar a programar diferentes actividades.

En que ámbito territorial ides actuar?

Basearemos a nosa actuación sobre todo neste concello.

Algunha actividade que fixerades e outras que teñades en axenda?

Dous cursos que organizamos en agosto e setembro tiveron moi boa acollida. Fixemos un de “Enxerto e mantemento de Castiñeiros”, e outro de “Poda de froitais”. Cubríronse todas as prazas e a xente quedou moi satisfeita.

A intención e organizar para este outono-inverno unha xornada de micoloxía . Decidiremos entre soci@s as actividades e campos de actuación de cara a 2023.

“A intención e organizar para este outono-inverno unha xornada de micoloxía”

Como animarías a que máis xente se achegue a coñecervos e se asocien?

Animamos a sumarse xente á asociación para ter a máxima forza e así poder na medida do posible dar visibilidade ao patrimonio que nos deixaron os nosos devanceiros e que non queremos que se perda. O noso correo electrónico de contacto é ascavarcas@gmail.com