O Concello da Pobra do Brollón colabora con Sete Outeiros para reivindicar no municipio o Día do Orgullo LGTBI+ no marco das xornadas Terras Diversas, que se desenvolverán este venres 30 de xuño e o sábado 1 de xullo na Pobra do Brollón e Monforte de Lemos, respectivamente.
Na Pobra do Brollón terán lugar este venres dúas interesantes actividades. A primeira delas será a proxección da película Alex e Munchie: Contra o cisheteropatriarcado ás 20:30 h. que contará cunha presentación previa a cargo das súas directoras Xàcia Ceive e Carmen PG Granxeiro.
O filme, de ficción documental, conta a historia dunha traballadora sexual e dunha aspirante a directora de cine que exploran o que significa representar vidas trans, ‘queer’ e lésbicas no arte.
E a segunda das actividades para reivindicar o ‘Día do Orgullo’ será un obradoiro de baile tradicional e unha foliada. Ás 22:00h comezará o obradoiro, que será impartido por Ruth Pérez, e de seguido, Foliada Quir. O concello convida á participación e lembra que as actividades son de balde.
OUTRAS ACTIVIDADES DA AXENDA CULTURAL PARA A FINDE
O sábado 1 de xullo, o concerto de Catuxa Salom inaugura o ciclo Novas Músicas Galegas. A súa potente fusión de música galega e ritmos tribais latinoamericanos escoitarase na Praza da Condesa ás 23:00 h, no casco histórico da Pobra do Brollón.
O domingo 2, a película de animación Valentina, dirixida por Chelo Loureiro, dará continuidade ao Ciclo Mestre Mateo. A proxección será ás 19:00 h na Casa da Cultura ‘Olga Novo’.
ACTIVIDADES EN MONFORTE
Serán o 1 de xullo e anúncianse como ‘maniFESTAçom’. Ás 20:00 h. está programada unha manifestación, con saída da Praza de San Antón, e ás 22:00 h. unha festa na Cervexería Mulligans. Neste local pinchará música a Riquinha DJ.
