A II Carreira e Andaina “Monforte en Marcha contra o Cancro” que se celebrou o 26 de novembro en Monforte tivo unha moi boa participación, calculándose que se puideron chegar ás 500 persoas inscritas. As camisolas feitas para a ocasión, e que se entregaban aos inscritos que achegaban tamén 10 euros para a causa, esgotáronse e houbo xente que correu con outra semellante pero que tiña a organización como sobrantes doutras carreiras solidarias que organizan.
Participaron tamén as Concelleiras de Muller e Igualdade, Margarita López; de Sanidade, Drogodependencias, Tráfico e Mobilidade, Pilar Espinosa; o concelleiro de Tecnoloxía e Innovación, Guillermo Díaz; a Presidenta da Asociación Española Contra o Cancro na provincia de Lugo, María Luz Abella; e membros da corporación municipal na oposición como Emilio Grande, Manuel Luaces –do BNG– e Katy Varela e José Luis –do PP–.
Esta carreira popular e urbana é de carácter benéfico e contou con categorías masculina e feminina cun primeiro, segundo e terceiro premio para cada unha.
COLABORACIÓN DO CONCELLO
“Dende o Concello, a través da Concellería de Deportes, colaboramos coa Asociación contra o Cancro no deseño do percorrido desta carreira, no que participaron tanto o Técnico de Deportes como a Policía Local”, recordou a concelleira Margarita López.
Ademais, para o desenvolvemento desta carreira, dende o Concello tamén se proporcionou o servizo de ambulancia, e as vallas necesarias para delimitar o circuito deseñado para a mesma. A Policía Local colaborou no corte e vixiancia do tráfico daquelas rúas polas que transcorriu a carreira: Francisco Moure, Paseo de Lugo, rúa Carude, San Lázaro Reboredo e Dalmiro de la Válgoma.
