A asociación ‘Polamiúda’ de Chantada organiza este vindeiro venres 14 de febreiro unha interesante e completa xornada feminista que contará coa presenza da recoñecida actriz e comunicadora feminista Pamela Palenciano.
Pola mañá, e co obxectivo de facer reflexionar á mocidade sobre as violencias machistas, interpretará o seu monólogo ‘No solo duelen los golpes’ ás 12.00 horas en exclusiva para os IES Lama das Quendas e Val do Asma (Chantada) acudindo tamén á cita o alumnado do IES Daviña Rey de Monforte. En ‘No solo duelen los golpes’, Palenciano recrea a situación de violencia machista que viviu na súa adolescencia. A comunicadora leva máis de 20 anos representando o seu monólogo por todo o Estado, traballo polo que ten recibido ameazas, insultos e incluso unha denuncia de Hazte Oir e a Asociación de Avogados Cristiáns.
Aproveitando a presenza de Pamela Palenciano, Polamiúda daralle continuidade á xornada para tratar as violencias machistas no eido das artes –un eido que por desgraza tampouco está libre de violencias, desigualdades e acoso–, contando coa súa participación na palestra ‘Mulleres, violencia e igualdade nas artes’ ás 20:00 h. no Auditorio Municipal de Chantada. O acto estará aberto a todo o público e contará, ademais de con Palenciano, coa actriz e dramaturga que vén de estrear ‘Vitória, retrato dunha denuncia’ (peza autobiográfica sobre o acoso sexual), Iria Pinheiro; coa actriz, directora de intérpretes e docente na Escola Superior de Arte Dramática de Galicia e membro da Comisión de Igualdade da Asociación de Actores e Actrices de Galicia, María Francelina; con outra intérprete e presidenta da Asociación de Actores e Actrices de Galicia, Arantza Villar; e coa consultora en Promove, empresa que prestou a asistencia técnica para a elaboración do Protocolo contra o acoso sexual e por razón de sexo/xénero nas artes escénicas e musicais de Galicia, Fátima Rodríguez Figueiras.
O obxectivo de xuntalas é que conversen e reflexionen sobre a realidade do sector das artes para as mulleres, as violencias que reciben e os mecanismos dos que dispoñen para mudar o escenario e que o sector das artes sexa un lugar seguro para técnicas, directoras, actrices, bailarinas, produtoras…
A entidade organizadora anima á participación no acto e lembra que será “a primeira palestra que se organiza tras a aprobación do Protocolo contra o acoso sexual e por razón de sexo/xénero nas artes escénicas e musicais de Galicia, de seguro que o debate será moi enriquecedor para participantes e asistentes”.
