Na presentación da IV edición da Carreira e Andaina, Monforte en Marcha contra o Cancro –que a delegación lucense da Asociación Española contra o Cancro impulsa en Monforte–, a concelleira Margarita López estivo acompañada polo Presidente da Asociación Española Contra o Cancro na provincia de Lugo, José Manuel Rozas Bello, e o director territorial de Política Social da Xunta de Galicia en Lugo. Tamén acudiu a esta rolda de prensa a concelleira de Consumo, Regina López Arias, e membros da Corporación municipal.
“Iniciativas de carácter solidario e social tan importantes coma esta, merecen todo o noso apoio”, comentaba a concelleira de Muller e Igualdade ao tempo que explicaba que o Equipo de Goberno colaborou activamente coa Asociación contra o Cancro no deseño do percorrido desta carreira, no que participaron tamén tanto o Técnico de Deportes como a Policía Local.
Dende o Concello tamén se proporcionará o servizo de ambulancia, e levarase a cabo a colocación das vallas que delimitarán o circuito deseñado para a mesma, un percorrido de 5 quilómetros que terá saída e chegada na Praza da Compañía.
No desenvolvemento deste evento solidario-deportivo participa tamén a Policía Local no que respecta ao control e organización do tráfico velando pola seguridade dos e das participantes.
PARTICIPACIÓN NA CARREIRA E ANDAINA
A concelleira, Margarita López, animou aos veciños e veciñas a participar neste evento deportivo e solidario e lembrou que o prazo de inscrición permanecerá aberto ata o 13 de setembro e pode facerse de xeito online ou no local da asociación.
O prezo para a inscrición é de 10€ e inclúe a camiseta. Todos os fondos recadados irán destinados a seguir mellorando a vida dos pacientes con cancro e as súas familias, e a impulsar a investigación oncolóxica para acadar un 70% de supervivencia no ano 2030.
