O dia 21 de setembro, co gallo do Día Mundial do Alzhéimer, a Confederación Española de Alzheimer e outras demencias (CEAFA) decidiu conmemorar esta efeméride baixo o lema “Igualando dereitos” para que os dereitos das persoas afectadas por esta condición se teñan en conta e igualen cos que xa se recoñecen a outros colectivos.
Dende a devandita entidade, reivindican o dereito a ser recoñecidos non só como persoas que conviven co Alzhéimer, senón, sobre todo, como grupo social, como colectivo, recibindo a mesma atención social e política que ata o momento se presta a outros colectivos que sufren discapacidade, enfermidades crónicas, enfermidades mentais, etc.
O ALZHÉIMER E A DEMENCIA EN DATOS
O Alzhéimer afecta en España a case 5 millóns de persoas o que equivale a preto do 11% do total da poboación española.
Datos relativos á demencia en Galicia: hai unhas 70.000 persoas con demencia, téñena 4 de cada 100 persoas e 15 de cada 100 maiores de 64 anos.
O envellecemento é o principal factor para a aparición dunha demencia e as proxeccións demográficas de Galicia nos próximos anos fan prever un aumento das persoas maiores de 65 anos do 23,15% actual ao 41% no ano 2050, aparellado a un descenso xeral da poboación. O Instituto Nacional de Estatística (INE) prevé que, para o 2050, Galicia terá 1.762.249 habitantes, dos cales o 41% serán maiores de 65 anos.
ACTIVIDADES DE AFAMON
Dende AFAMON (Asociación de Familiares de Enfermos de Alzhéimer de Monforte), súmanse a conmemorar o ‘Día Internacional do Alzhéimer’ saíndo á rúa o vindeiro sábado 20 de setembro. Ese día, de 10 a 14:00 h. poñerán unha mesa informativa na céntrica Rúa do Cardeal de Monforte que contará coa presenza de xente da directiva, voluntarios/as e traballadores/as da entidade de carácter asistencial.
Na devandita ubicación ofrecerán información sobre a enfermidade e tamén darán a coñecer a entidade e as actividades que desenvolven durante o ano. Ademais, haberá folletos informativos con consellos para coidadores/as de persoas coa enfermidade, lotaría de Nadal con donativo e unha exposición de traballos manuais realizados coa colaboración de persoas usuarias/os de AFAMON.
