O IES Daviña Rey de Monforte foi o anfitrión dunha interesante e divulgativa xornada sobre o voluntariado á que acudiron representantes de varias entidades do terceiro sector que traballan na Comarca de Lemos.
O obxectivo central do acto foi introducir ao alumnado de secundaria e dos ciclos formativos no coñecemento e aspectos claves da Lei 45/2015 de Voluntariado para poder coñecer os dereitos e deberes das persoas voluntarias, así como tamén as oportunidades que se presentan na contorna para poder axudar en causas sociais.
Na mesa de ponentes estiveron representadas varias asociacións que están a traballar en distintos ámbitos da acción voluntaria, desde o sociosanitario ata o deportivo, o animalista e o ambiental. As entidades presentes foron: Albores Saúde Mental, Asociación Española contra o Cancro, Cáritas, Prodeme e Miau de Lemos.
No transcurso da xornada houbo unha mesa redonda con testemuños de persoas voluntarias que compartiron co alumnado a súa experiencia de vida, o cal resultou moi inspirador para todos os asistentes.
Dende o IES Daviña Rey afirman que este tipo de iniciativas “demostran a aposta do centro por unha educación aliñada cos obxectivos de desenvolvemento sostible e polo compromiso e participación social do alumnado”.
Dende Prodeme, unha das asociacións participantes, sinalaban que “defendemos un modelo de voluntariado basado no acompañamento, no deporte inclusivo e na creación de espazos onde todas as persoas poidan desenvolver as súas capacidades. Compartir estas experiencias co alumnado é unha oportunidade extraordinaria para sementar compromiso, responsabilidade e solidariedade entre as xeracións máis novas”.
