Este sábado, 14 de marzo, houbo unha nova acción de protesta para reclamar o arranxo da N-540. Nesta ocasión formouse unha caravana dun cento de vehículos entre Chantada e A Barrela, nun percorrido duns dez quilómetros, para facer máis visible a reivindicación da veciñanza. A marcha saiu ás 11 do Mercado Gandeiro de Chantada e chegou sobre as 12 á Barrela, ao Hotel Río Búbal.
A convocatoria foi feita a nivel particular, por un grupo de veciños da comarca, contou co apoio da Asociación de Empresarios de Chantada e nela participaron representantes políticos, como o Alcalde de Chantada.
No percorrido realizado polos vehículos participantes, que estiveron acompañados por algunhas unidades da policía local e da Garda Civil, non houbo ningún incidente. No remate do mesmo, xa no aparcamento do Hotel Río Búbal, os manifestantes despregaron unha pancarta na que destacaba o lema de “N-540 arranxo xa, por favor”.
