O Concello de Monforte súmase á campaña “A tolerancia apaga o odio 2026”, con motivo da conmemoración do Día Europeo das Vítimas de Crimes de Odio (22 de xullo), para lembrar ás vítimas do crime de odio terrorista de Oslo e Utoya, e á súa vez, de todas as vítimas da intolerancia criminal e os delitos de odio.

A campaña, que vén contando ano tras ano coa implicación de centenares de concellos, universidades, entidades sociais e outros organismos, consiste na iluminación en cor azul de enclaves significativos ou espazos de interese na noite do 22 de xullo. No caso de Monforte, iluminarase a Torre da Homenaxe, no Conxunto Monumental de San Vicente.

Esta iniciativa pretende, de maneira simbólica, “acender a luz da Tolerancia fronte ao Odio e lanzar unha mensaxe de unidade fronte á intolerancia”, explican dende o Concello de Monforte.