‘Red DUActiva: Diversidade, Acción e Transferencia na aula’ é unha iniciativa financiada pola Fundación ONCE e o Ministerio de Derechos Sociales, Consumo y Agenda 2030 que ten como obxectivo garantir o dereito á educación inclusiva do alumnado con discapacidade mediante unha intervención integral dirixida a toda a comunidade educativa.
Entre as actuacións desenvolvidas por COGAMI, en colaboración con COCEMFE, atópanse a formación e capacitación do persoal docente, o acompañamento aos centros educativos, a elaboración de materiais baseados no Deseño Universal para a Aprendizaxe (DUA) e o apoio ás familias, promovendo redes de colaboración e espazos para compartir coñecementos e experiencias.
BALANCE DO PROXECTO NO 2026
No que levamos de ano, Red DUActiva asesorou en materia educativa a 34 familias e chegou a 50 centros educativos e 30 entidades. Ademais, formou 325 docentes e sensibilizou a preto de 1.400 alumnas e alumnos nas catro provincias galegas. No sur de Lugo desenvolveuse nos concellos de Chantada, Pantón, Samos e Bóveda.
CONTINUIDADE DO PROXECTO NESTE NOVO CURSO
Co inicio deste curso, durante o primeiro trimestre o programa continuará coa formación dirixida ao profesorado e ás familias, a elaboración de novos materiais DUA e o préstamo de produtos de apoio aos centros educativos para facilitar a participación do alumnado que os precise. Ademais, segundo explican dende COGAMI, “manterase a atención e orientación ás familias de alumnado con necesidades educativas especiais derivadas da súa discapacidade, ofrecendo información e acompañamento adaptados ás súas necesidades”.
Entre os produtos de apoio máis solicitados destacan os dispositivos relacionados cos Sistemas Aumentativos e Alternativos da Comunicación (SAAC), así como diferentes solucións tecnolóxicas, como tablets, teclados e outros dispositivos que facilitan a comunicación, a aprendizaxe e a participación do alumnado.
Red DUActiva aposta, en definitiva, por trasladar a inclusión á práctica diaria dos centros educativos, proporcionando ferramentas e recursos que permitan eliminar barreiras e favorecer a igualdade de oportunidades para todo o alumnado.
