Aínda que foi moito o que se conseguiu está no noso ánimo o continuar con aqueles proxectos que por falta de tempo material non foi posible levalos a cabo.

Continuaremos coa construción e mellora das redes de saneamento e abastecemento a todos os núcleos do concello que aínda non contan con eles. Nos nosos plans está conseguir que ao final do próximo mandato estea practicamente completado o saneamento rural.

É importante manter e mellorar as infraestruturas viarias así como a delimitación dos núcleos rurais de poboación, o desenvolvemento do Polígono Industrial que ano tras ano a Deputación Provincial deixa sen iniciar a pesar de ter reservada dotación económica.

No eido cultural é prioriatario o manter en bo estado o noso patrimonio á vez que se abren novas espectativas como as escavacións do Preguntoiro, escavacións arqueolóxicas de Castillón ou a posta en valor do castro de Guítara. Continuaremos apoiando as actividades, empresas e proxectos no eido turísitico, así como todas as citas que divulgan a nosa cultura como pobo como a Mostra de Viños de Pantón, a Rota do Románico de Pantón ou o Trece Roeis Fest. Nesa aposta polo turismo temos para contratar a ruta de sendeirismo que parte de Augas Santas, Moreda, Serpentiña e Cornedo con regreso a Augas Santas ou o Miradoiro de Bazal.

No social seguiremos e melloraremos os programas de Ximnasia e Concilia, incroporando o servizo de Madrugadores. Mentres a Deputación segue sen construir a residencia da terceira idade, a Fundación San Rosendo abrirá dúas, unha que xa ten licenza e outra para a que elaboraremos un plan especial.

Presentamos unha candidatuta continuista, seguimos os mesmos que eramos porque cando algo funciona non se cambia. Cumprimos cos nosos compromisos e non todos poden dicir o mesmo. Por todo isto pido o voto para o noso partido, sabendo de antemán que nunca os defraudaremos.