Desde Agroma Sober sinalan que logo de ser apoiado con fondos públicos, a actual xestión do Pazo de Sober non permite o acceso aos xardíns nin ás instalacións da planta baixa do Pazo, como teñen sinalado veciños e visitantes.

Lembran desde Agroma Sober que un dos compromisos tanto do Concello como da Consellería de Cultura fora ter fórmulas de colaboración na “organización de convocatorias culturais” así como “na promoción do turismo de calidade”; asemade, o Goberno Local comprometeuse a facer seguimento da marcha do hotel. Sen embargo desde Agroma aseguran que neste verán teñen recibido múltiples queixas pola imposibilidade de visitar os xardíns e as zonas comúns do Pazo, así como pola imposibilidade de facer uso da cafetería.

Con estes antecedentes, na moción da Agroma soicitan ao Concello que traslade á Xunta a necesidade de estudar a súa declaración como Ben de Interese Cultural, do conxunto ou de partes do Pazo, de xeito que se tería obriga de establecer un réxime de visitas.

Por outra parte, Paula Vázquez Verao rexistrou no Parlamento unha batería de iniciativas dirixidas ao IGAPE para coñecer en extenso a xestión na concesión das axudas ao Pazo que recibiu do IGAPE 887.619 euros habendo posibles incumprimentos nas condicións de concesión de axudas.