Aproveitando a derradeira feira do ano en Quiroga -o pasado día 27- e o sábado 28 de decembro, o concelleiro Xosé Manuel Fernández, acompañado doutros membros da formación nacionalista, visitaron diferentes establecementos da vila de Quiroga. O obxectivo desta acción foi compartir uns minutos cos comerciantes, preguntar como van os negocios e ofrecer o seu apoio de cara a futuras ideas ou proxectos que poidan mellorar as vendas. Como detalle simbólico agasallaron a estes emprendedores cun calendario para o vindeiro ano 2020, calendario no que destaca un deseño representativo do “Comercio de Quiroga”.

A obra gráfica, realizada coa colaboración da empresa local Deikí, representa un corazón que se adapta á forma do mapa territorial do concello de Quiroga destacando sobre a mesma o lema “Comercio de Quiroga, o latexo do teu pobo”.

A acción, que pretende tamén sensibilizar a quiroguesas e quirogueses para que teñan presente o comercio local como primeira opción para facer as súas compras, terá continuidade a principios de ano con outras empresas e negocios do concello.

Dende o BNG quirogués comentan como anécdota que un comerciante lles trasladou que ten visto casos de xente que merca por internet e despois atopa en Quiroga o mesmo produto, e incluso máis barato. “Este feito demostra o pouco que se valoran e o pouco que se coñecen as posibilidades do comercio local, situacións que se deben corrixir”, engaden dende a formación nacionalista.