O BNG de Sarria acusa á Xunta de Galicia de “intentar baleirar o ensino público” coa súa xestión con respecto ao Ceip Frei Luis de Granada, pechado desde o pasado mes de xaneiro cando o deterioramento do edificio obrigou a reubicar o seu alumnado.
Segundo explican desde a formación nacionalista, as familias coñeceron este martes pola tarde a existencia dun plan da Consellería da Educación para reformar o centro. A información chegou ás familias ó día seguinte de rematar o período de prematrícula, o pasado luns polo que, ante a falta dunha alternativa para o inicio do vindeiro curso en condicións óptimas, algunhas decidiron reservar praza noutros centros.
“A Xunta, que nos ten acostumados a despregar toda a súa maquinaria de propaganda para anunciar outras obras, neste caso, decidiu calar e deixar pasar o prazo de reserva de matrículas. Só cabe pensar que foi unha manobra para botar aos nenos e nenas do colexio público”, explicou o voceiro nacionalista Efrén Castro.
O BNG de Sarria rexistrou este martes unha moción urxente para reclamar ao goberno galego “solucións para o CEIP Frei Luis de Granada”. A proposta acusa á Xunta de “estar centrada en convocatorias electorais” poñendo os intereses partidistas por riba do funcionamento dun servizo público básico como é a educación.
A moción tamén solicita á Xunta de Galiza que “asuma as súas competencias” e dote a residencia de maiores Nosa Señora do Carme con fondos para implementar as medidas de protección e prevención necesarias ante a Covid 19.
Efrén Castro recordou que “o goberno galego leva anos sen invertir un euro no xeriátrico malia que os servizos sociais son competencia da Xunta”.
