A situación marcada pola Covid19 está poñendo atrancos moi importantes ao desenvolvemento económico. Desde o BNG de Quiroga consideran que “das crises sempre saen oportunidades, e son tempos de afiar a ferramenta, de prepararse para saír da crise nas mellores condicións e con perspectiva de futuro.”
Segundo os nacionalistas, concellos como Quiroga, que dependen das subvencións, teñen que aproveitalas e empregalas para xerar valor e preparar o escenario para atraer empresas e para promover iniciativas de emprendemento dende dentro do propio territorio.
Desde o BNG aseguran que o pasado mes de xaneiro preguntaron por axudas para a mellora de parques empresariais e para a creación de viveiros de empresas e a día de hoxe seguen sen contestación e descoñecendo se chegaron a solicitarse. Para estas cuestións, o BNG lembra que non existe a figura do ‘axente de desenvolvemento local’, que sería importante incorporar porque é a figura que cubre funcións deste tipo.
Así o BNG presenta un rogo no concello solicitando confirmación de se chegaron a solicitarse esas subvencións para a mellora do parque empresarial e para a creación de viveiros de empresas; que se habilite algunha instalación municipal como ‘coworking’ e que se valore o aproveitamento da sala CeMIT (Centro para a Modernización e Inclusión Tecnolóxica) da Casa da Cultura para ofrecer charlas e sesións de asesoramento emprendedor.
