O BNG defende a volta dos pequenos vendedores de produtos agrarios ao centro da vila (prazas do Cantón, do Mercado e Santa Ana) e apoia as reclamacións feitas pola Asociación de Empresarios e Comerciantes e outras afectadas no mesmo sentido.

Segundo os nacionalistas esta medida é beneficiosa para todas as partes implicadas por:

1. Axuda ás pequenas produtoras agrarias e ao sector primario que pode comercializar unha parte da súa produción vendendo directamente a consumidores.
2. Atrae xente e actividade económica a unha zona con amplas posibilidades, especialmente tras a súa peonalización.
3. Favorece ao comercio e hostalaría locais nun momento de grandes dificultades polos efectos da pandemia.

O BNG insta ao grupo de goberno a que reconsidere a súa decisión de desprazar a estas produtoras e recupere tan importante actividade da feira para a zona vella e Praza de Santa Ana.