A veciñanza de Taboada e os negocios están a sufrir a falta de iniciativa da Alcaldía para darlle unha solución definitiva á calidade da auga da traída, situación que o BNG asegura se complica coas tormentas.

O BNG lembra que dende as últimas obras financiadas pola Xunta, que xa consideraron no seu momento insuficientes, non se acometeron novas melloras na estación potabilizadora.

Para o BNG a solución segue a estar en conquerir novas captacións que melloren a calidade da auga xa dende o principio, dando á veciñanza e aos negocios a auga que merecen e pola que pagan. Os nacionalistas reclaman á Xunta que interveña na solución definitiva deste problema e que os próximos recibos a cobro recollan descontos polas deficiencias do subministro.