A portavoz nacional do BNG sinalou, tras a súa visita ao centro do viño e á sede da D.O. Ribeira Sacra, que as contas públicas que presenta o Goberno son “un retrato de como seguen pendentes, ano tras ano, infraestruturas e servizos longamente esperados pola veciñanza de Monforte pero sen que se fagan realidade e iso ten un custe moi alto porque se perden oportunidades: oportunidades de asentar empresas, oportunidades de xerar emprego de calidade, oportunidades para revitalizar socialmente o concello, oportunidades para frear a sangría de xente moza que marcha e oportunidades que se perden para impulsar os sectores produtivos”.

Pontón foi crítica cos incumprimentos con Monforte e comarca por parte do Executivo galego, en particular en infraestruturas como o Porto Seco, plataforma loxística de 54.000 metros cadrados, que sete anos despois da súa finalización aínda non conta con ningunha empresa instalada. “Tras un investimento de 20 millóns de euros o Goberno de Fexióo non foi capaz de facer os deberes para converter o Porto Seco nun polo de atracción económica, nin tan sequera se teñen concluídas as conexións coa N-120.”

En materia de servizos públicos, considera Pontón que tamén hai unha débeda con Monforte, referiuse en concreto á sanidade, “cun plan de mellora do Hospital de Monforte anunciado en 2019 que prevía un investimento de 15 M€ até 2024, pero que apenas está dando os primeiros pasos, cunha execución do 10% da contía anunciada e tendo en conta que nos orzamentos de 2022 a partida consignada é de 700.000 €.”

Segundo a nacionalista, a este ritmo de investimento a veciñanza de Monforte deberá esperar 17 anos máis do para ver completado o plan de mellora do hospital comarcal no 2040″. Tamén avanzou que o BNG demandará na Cámara a contratación de especialistas e a dotación dunha UCI para o centro hospitalario.

No ámbito económico, a portavoz do Bloque destacou a puxanza do sector vitivinícola grazas á calidade dos caldos da denominada viticultura heroica, e tamén abordou a importancia para Monforte e comarca de promover un “turismo sustentable”, respectuoso co inmenso e valiosísimo patrimonio natural da Ribeira Sacra. Neste sentido lembrou que o “contundente” informe de ICOMOS debe servir como reflexión sobre o modelo turístico que se debe impulsar para que sexa sustentable e de calidade.

“Servizos de calidade e políticas que se traduzan en creación de emprego son as mellores ferramentas para frear a perda de poboación da Galiza interior”, concluíu Pontón na súa visita, que rematou cunha xuntanza na Pobra do Brollón co rexedor local.