O BNG de Chantada presentou por rexistro unha petición para que o goberno municipal promova a redacción e aprobación dun Plan Xeral de Ordenación Municipal para “acabar dunha vez por todas coas continuas revisións que utilizan para elevar os valores e imputar aos suxeitos pasivos os erros históricos dun organismo que nunca tivo en conta nin
as peculiaridades dos núcleos galegos, nin as deficiencias, nin o dereito
consuetudinario galego, o que leva sempre a pagar e, lonxe de subsanar a situación, emprega medidas coercitivas que obrigan ao pagamento ao titular catastral sexa cal for a realidade.”
O responsable Local do BNG Manuel Moure, cre que “unha vez analizada a resposta do goberno de España, que sinala o desenvolvemento dun PXOM como vía para a solución dos continuos procesos que levan afectado ao concello nos últimos anos, parece razoable que o goberno municipal, cunha maioría absoluta, poda sacar perfectamente adiante un PXOM que pare a sangría económica que sofren os titulares catastrais no municipio, máis se cadra non actual contexto socioeconómico”.
“Non deixa de ser un problema creado polas administracións que nos repercuten aos administrados, e se non se renova a Ponencia de Valores municipal, e seguimos sen PXOM, somos susceptibles de volver
sufrir máis procesos”, insisten os nacionalistas, que lle lembran ao Goberno Local que “estamos no momento idóneo para baixar o coeficiente dos IBIS das explotacións gandeiras e das vivendas habituais, xa que toda axuda é pouca na actualidade”, din.
