A deputada do BNG explicou que despois de trece meses da presentación da moción de censura, “a situación non mudou”, e tanto o labor de Medio Rural como a do director de AGACAL non contribuiron a resolver a crise de goberno polo que esixiu “responsabilidades” ao titular da Axencia galega de Calidade Alimentaria.
A nacionalista sumou as súas criticas a falta de resposta do Consello Regulador aos requirimentos da Valedora do Pobo dos documentos da moción de censura.
Para a deputada, “Medio Rural e AGACAL fixeron deixación de funcións e tomaron partido no conflito. Os asinantes da moción de censura queren unha resposta sobre o que consideran unha vulneración da democracia e que se cumpra a lei”.
Segundo o BNG todo indica que tanto a consellería como AGACAL “continúan na súa postura inmobilista e a Denominación de Orixe permanece coa dirección bloqueada cun conflito permanente que dura trece meses”.
A consellería respondeu que o Consello Regulador entrou en función o 27 de xullo, non había polo tanto lugar a debater “a moción de censura” e sinalou que todo quedaría solventado coa convocatoria electoral nos primeiros seis meses deste ano.
María Albert afirmou que gobernar é enfrontarse aos problemas e o “Partido popular mira para outro lado e mesmo ampara situacións que chegan a seren irregulares. Que intereses se están a defender dende a consellería?” preguntou.
