Os socialistas destacan na moción o éxito da posta en servizo do Polígono dos Acivros en 1986, que xa en 2013 precisou dunha primeira amplicación e que conseguiu fixar tecido industrial no concello.

A voceira socialista, Raquel López, destaca que “é grazas ó propio éxito do polígono que na actualidade non quede apenas solo dispoñible, pola alta demanda”. Precisamente, a principios do mes de novembro unha das empresas afincadas no polígono chantadés, Galletas Daveiga, inaugurou unha nova nave de produción. Os socialistas poñen esta empresa como exemplo da importancia de apostar polo fortalecemento dun tecido industrial que, en boa parte, está ligado á transformación de produtos da terra. “Fixar industria en solo chantadés é esencial polo seu valor económico, mais tamén social, de cara á creación de postos de traballo e fixación de poboación”, inciden dende o PSOE.

Os socialistas pedirán en pleno modificar o Plan Xeral de Ordenación Municipal (PXOM) e promover os proxectos necesarios para poder levar a cabo esa segunda ampliación do polígono. Ademais, solicitarán que sexa a Consellería de Economía, Industria e Innovación da Xunta de Galicia quen leve a cabo a promoción, financiamento e execución das obras.