Os populares consideran neste sentido que “de nada vale un centro de ciberseguridade se nin o concello de Monforte nin a provincia contan con boas conexións ferroviarias co resto de cidades galegas e con España”. Lamentan así mesmo o “partidismo” deste anuncio, xa que nin o Goberno galego da Xunta tiña coñecemento previamente nin se contou no acto con ningún representante do Partido Popular.
Desde o PPdeG sosteñen que “a aposta pola conectividade de Galicia e de Lugo demóstrase con investimentos necesarios e non con anuncios”, facendo referencia a que nos Presupostos Xerais do Estado para 2023 non se contemplen nin as variantes de trazado nin a conexión por alta velocidade de Lugo. Os populares lembran, ademais, a listaxe de incumprimentos e demora que acumula a alta velocidade en Galicia, sobre todo a chegada dos trens Avril, anunciada para o pasado verán.
Arias: “Desbloquear o proxecto de acceso ao porto secto depende exclusivamente do ADIF”
O PP tamén insiste coa situación de bloqueo do porto seco de Monforte. O delegado territorial da Xunta en Lugo, Javier Arias, asegura “demostra unha total falta de vontade do Goberno central de sacar adiante esta infraestrutura, na que a Xunta de Galicia leva investidos en total preto de 20 millóns de euros”. Arias considera que a posibilidade de que Monforte teña nun futuro o centro de ciberseguridade ferroviario é unha boa nova, pero cre que “tería sido mellor noticia que aproveitaran esa reunión para pedir o desbloqueo do proxecto do acceso ao porto seco”.
Neste sentido, o delegado territorial insiste en que a execución da conexión desta futura infraestrutura coa a N-120 sigue bloqueada desde hai anos ante a falta de compromiso do Goberno central que non colabora no desenvolvemento desta infraestrutura e que, aínda por riba, obstaculiza as autorizacións necesarias para avanzar nesta intervención.
Desde a Delegación Territorial da Xunta en Lugo, o seu máximo responsable lembra que unha vez aprobado, en 2019, o novo proxecto de trazado e impacto ambiental, “o Goberno do Estado esixe para autorizar a conexión a supresión dun paso a nivel, que, nada ten que ver coa actuación que propón a Xunta de Galicia, razón pola que creo que a postura do Goberno central está bloqueando a actuación en Monforte”.
Arias asegura que a Xunta aposta por esta infraestrutura cunha bonificación do 50% na adquisición de solo industrial no porto seco, buscando favorecer a implantación de empresas e industrias e considera que “tiñamos unha oportunidade irrepetible de darlle pulo á infraestrutura con recursos do Mecanismo de Recuperación e Resiliencia (dos fondos europeos Next Generation). E así llo solicitou a Xunta expresamente ao Goberno central, pero desestimaron a petición; de feito excluíron a practicamente todo o territorio galego de poder acceder a estes fondos en materia de mobilidade”.
