Os socialistas levarán ao pleno deste martes unha moción na que instan ao Goberno galego a arranxar a estrada autonómica LU-651, no tramo de Folgoso a Quiroga, afundida hai case un ano, para mellorar o seu trazado e dotala dos muros de contención e elementos de sinalización e seguridade propios dunha vía das súas características.
Na mesma moción, o Partido Socialista demanda así mesmo á Xunta o acondicionamento e ampliación da estrada entre Seoane e Folgoso do Courel, “que leva pendente, bloqueada e sen executar dende fai mais dunha década, para mellorar as conexións e a cohesión territorial da provincia de Lugo”.
Os socialistas advirten de que a situación da LU-651 “é un bo exemplo da desidia, a mala xestión e a dobre vara de medir do PP no que respecta ás infraestruturas viarias da nosa provincia. A mediados deste mes de febreiro coñecíamos os efectos dos temporais dos meses de decembro e xaneiro, que a Xunta non dera a coñecer antes. A mala situación detectada nos quilómetros 18, 28 e 29 están a precisar novas obras de reparación, con cortes que obrigan ós vehículos pesados a facer un trazado alternativo cun rodeo de 30km, coas molestias e o incremento de custe que isto supón”.
Dende o PSdeG inciden en que a “actual situación pon de manifesto que a Xunta non fai as obras de mantemento precisas para garantir o bo estado das súas estradas, nin actúa con dilixencia cando se producen deterioros graves.”
