O PP de Monforte lamenta que o concello non ampliara prazas de Educación Infantil coas axudas da Xunta

Os populares de Monforte din non entender que o concello propoña un acordo plenario para instar á Xunta a poñer en marcha unha escola infantil pública, "cando o propio Goberno municipal perdeu a oportunidade de solicitar investimento habilitado polo Goberno galego para reforzar o centro municipal de atención educativa infantil ou crear un novo centro."

pleno Monforte / XdL

A portavoz popular, Katy Varela, indica que “a Xunta de Galicia puxo á disposicións dos concellos máis de 30 millóns de euros para que se acolleran a unha axuda para aumentar as prazas de 0-3 na escola infantil municipal ou para crear un novo centro e o Concello de Monforte non solicitou nada para unha posible ampliación da escola infantil municipal”.

Os populares pregúntanse “por que, se existe esa demanda de prazas, o Concello de Monforte non fixo absolutamente nada. A inacción do goberno local monfortino non se entende porque por outros concellos da contorna, como o de Sober, si se solicitou a axuda e creará 20 novas prazas”. Queren saber tamén por que despois do peche da escola infantil de San Vicente de Paúl, “e sabendo o Concello da necesidade de prazas no municipio, o goberno monfortino non optou por solicitar o financiamento da Xunta.”

Os populares destacan que o Goberno galego destina máis de 55 millóns de euros a que máis de 31.000 familias de Galicia leven gratis aos seus fillos a unha escola infantil. Isto permite un aforro dunha media duns 2.000 de euros ao ano por fillo, e xusto nun momento no que se está a producir un incremento considerable dos custes da vida.

DEIXAR UN COMENTARIO

Please enter your comment!
Please enter your name here