Roi Rigueira presentouse por primeira vez á Alcaldía de Taboada nas pasadas eleccións e estivo a 14 votos de poder gañar, “Por iso, agora tras este intenso traballo nestes últimos catro anos en Taboada, percorrendo as parroquias e atendendo as demandas da veciñanza, verán os seus froitos cun excelente resultado electoral”, sinalaba García Porto.

A dirixente socialista dixo que “Taboada debe ter un cambio de rumbo político liderado por Roi Rigueira e todo o seu equipo, para que promovan políticas progresistas que contribúan a sacar a este concello da parálise na que se atopa actualmente, e para convertelo nun concello próspero, moderno, que fortaleza o tecido produtivo, que apoie ao medio rural e preserve a súa riqueza natural. Unha Taboada de oportunidades para a xente máis nova e de dignidade para os maiores”.

O candidato agradeceu o apoio que está percibindo da veciñanza: “Sei que temos un camiño duro por percorrer, pero acompáñanme as mellores persoas. Son homes e mulleres transparentes e sen intereses persoais, de diferentes parroquias, idades, profesións e puntos de vista, pero cun nexo en común que nos une, Taboada. Nacemos e vivimos aquí e todo o que temos está aquí”.

Rigueira considera que “Taboada está vivindo unha situación moi difícil, con éxodo rural e un alarmante descenso de poboación, subdesenvolvemento industrial que impide a creación de postos de traballo e fixar poboación e unha perda paulatina e progresiva de servizos, o mal estado das infraestruturas rurais, o esquecemento das nosas aldeas, a perda de valor das nosas propiedades e, o peor de todo, a nula intención do Alcalde e do equipo de goberno para que isto cambie”. 

“Por todo isto, creo que o cambio á fronte do goberno de Taboada é máis necesario ca nunca. Porque está en xogo o benestar e o futuro da nosa xente, e estou firmemente convencido de que quen leva tantos anos deixando morrer a Taboada non pode seguir nin un día máis no Goberno municipal”, incidiu o candidato socialista.