José Rodríguez destacou que a renovación supera o 44%. Trátase, por tanto, dunha lista “pensada para gobernar e para que quen gañen sexan os veciños de Ribas de Sil. Somos un equipo implicado con Ribas de Sil que traballa unido e de forma conxunta co obxectivo de mellorar os servizos aos veciños. Somos nove persoas, cunha mestura de xente nova e tamén de xente con experiencia no ámbito da política municipal”. Repiten catro dos nove integrantes, entre os que se atopan os actuais concelleiros -Isaac Lamas e Rosa Novoa- que pechan a lista.
O alcaldable puxo en valor que “son xente vinculada ao terreo, xente de distintos ámbitos e implicada na vida social do municipio”, afirmou. Rodríguez agradeceu que deran un paso adiante e se impliquen nun proxecto de futuro para Ribas de Sil centrado en fomentar o asentamento da xente nova, potenciar o noso -viticultura e turismo- e, sobre todo, en atender as necesidades dos veciños”. O popular sinalou, por exemplo, a mellora dos espazos públicos e acondicionamento das pistas, o impulso da dinamización social a través de actividades e deporte para mozos e maiores, a atención social coa mellora do SAF e a dotación de servizos. Os populares aseguran estar recollendo as suxestións a veciñanza para implantar no concello e lembran que grazas ao Goberno galego en poucas semanas o municipio contará con servizo de caixeiro automático.
A lista completa é a seguinte:
- Jose Rodríguez Fernández. Socorrista e peón forestal vinculado ao deporte.
- Emilia Sandra Macía González. Emprendedora e empresaria viticultora.
- José María González Álvarez. Traballador de piscifactoría e veciño que participa activamente na vida social da súa parroquia, Torbeo.
- Emilio Fernández Arias. Xubilado retornado ao seu municipio natal.
- Jesús Ballesteros Pardo. Xubilado e ex concelleiro popular no municipio.
- Rosa Novo Castro. Administrativa e concelleira do PP durante os últimos 8 anos.
- José Isaac Lamas Álvarez. Comerciante e concelleiro do PP durante os últimos 12 anos.
Suplentes: Jesús Vicente Fernández. Brigadista e veciño da parroquia de San Pedro; Daniel León López. Peón do sector da construción.
