Durante a presentación expuxéronse as ideas principais do programa “para sacar a Bóveda da parálise e o esquecemento, democratizar o trato a toda a veciñanza sen exclusións, nin favoritismos”. O candidato á alcaldía, Xavier Castro, insistiu na necesidade de dinamizar a vida económica, cultural e política do concello. A loita contra o despoboamento, o apoio á cultura, desenvolver unha economía circular que deixe beneficios no concello son algunhas das actuacións propostas. Recollen a necesidade de mellorar as estradas municipais e dunha residencia de anciáns e centro de día, “que empezarán os trámites nada máis empezar no goberno para que estean funcionando antes de rematar a lexislatura.”

O Servizo municipal de auga é outro compromiso do BNG, “non podemos ter a traída de auga só nas vilas e, en épocas de seca velar en todo momento o subministro para facer fronte ás cianobacterias xa que a auga é un ben de primeira necesidade non só para as vilas, tamén para as parroquias e familias que lles secaron as traidas particulares co quecemento global e están sen ela desde hai 1 ano e o Concello non atende as súas demandas, son varias parroquias con este problema.”

O BNG pretende loitar contra a fenda dixital no Concello, mellorando infraestruturas e ofertando cursos de alfabetización dixital a toda a veciñanza. “Faremos unha política humilde de todas para todos sen desprestixiar, atendendo tamén ao turismo e ao rico patrimonio do concello que en ningún momento se está a facer visible.” concluíu Xavier Castro que se despediu cuns versos do escrtitor Lois Diéguez que pecha a candidatura.