Os socialistas amosan como exemplo un vídeo que circula nas redes sociais, gravado este luns no interior do bus que cubre a ruta Lugo-Monforte ao seu paso pola Pobra de San Xiao, onde pode verse a varias persoas ocupando o corredor ante a falta de prazas. “Esta liña é moi empregada por rapaces e rapazas de Láncara, O Páramo, Sarria ou o Corgo para ir a cursar os seus estudos de bacharelato ou FP á capital da provincia ante a falta de alternativas nos seus municipios”, aseguran.

Este autobús, operador por Monbús, chega ás 7:48 horas á Pobra de San Xiao xa sen prazas para recoller ás persoas usuarias, a maioría estudantes, que se atopan na parada. Advirten os socialistas que “chegaron a quedar nesta parada ata 10 estudantes nas últimas semanas e que moitos teñen que coller o seguinte autobús, ás 9:00 horas, e chegar tarde as súas clases.”

O concello de Láncara levará a Pleno unha proposta de Alcaldía para instar á Consellería de Infraestruturas e Mobilidade a que oferte máis viaxes neste traxecto, denunciando que as liñas de autobuses aos distintos municipios do rural son cada vez máis escasas, “o que obriga a moitos a desprazarse en vehículos particulares e mesmo a quedarse en terra”.

Os socialistas elevaron tamén ao Parlamento autonómico a súa demanda para que a Xunta reforce, polo menos, a liña das 7:00 horas entre Lugo e Monforte de Lemos, que é a que xera máis problemas. Lembran que o caso da Pobra de San Xiao non é unha novidade, “con problemas ocasionados polos retrasos, reducións de frecuencias horarias, supresión de servizos sen previo aviso, falta de publicidade de horarios, falta de prazas nos autobuses,….”