Este mércores pola tarde celebrouse o acto de clausura e entrega de premios da Fase Galega da Olimpíada de Xeoloxía, que nesta XVII edición fixou en Monforte unha das súas 4 sedes en Galicia. O campionato celebrouse este mércores simultaneamente no Xeoparque do Cabo Ortegal, Santiago, Vigo e Monforte, e os estudantes que obtiveron as dúas mellores cualificacións en cada sede obteñen con este premio o seu pase á Fase Española, que terá lugar o 21 de marzo en Vigo (Pontevedra).
No caso de Monforte, a actividade contou coa colaboración do Concello de Monforte a través da cesión da Casa da Cultura para o desenvolvemento das probas, unha visita á Torre da Homenaxe para os participantes e os docentes que os acompañaron e un obsequio para cada un deles. En total, Monforte acolleu a 84 estudantes procedentes de 11 centros educativos das provincias de Lugo e Ourense. A representación monfortina contou con 8 alumnos do IES Río Cabe, que colaborou na organización do evento.
Na súa intervención na clausura e entrega de premios, a Tenente Alcalde Gloria Prada felicitou a todos os participantes e amosou a súa satisfacción por acoller en Monforte unha proba destas características.
A XVII Olimpíada de Xeoloxía é una actividade convocada pola AEPECT (Asociación Española para la Enseñanza de las Ciencias de la Tierra), a Sociedade Española de Xeoloxía e o Colexio Oficial de Xeólogos. Está dirixida á alumnado de 4º de ESO e 1º e 2º de Bacharelato que se enfronta a unha proba práctica grupal e a unha proba teórica individual consistente nun test.
“Iniciativas como esta son sempre enriquecedoras”, engadiu a Tenente Alcalde, que agradeceu á AEPECT e á súa representante na Olimpíada, Belén Pérez, que escollera Monforte para a celebración destas probas. Tamén tivo palabras de agradecemento para todos os docentes e, en especial, para o IES Río Cabe e a docente María Padrón, que se involucrou na organización do evento.
Estudantes premiados
Mellor equipo: Laura López Núñez, Lucía Álvarez González, Adrián Rodríguez Ruiz e Gabriel Guede Gómez, do IES Xesús Taboada Chivite (Verín).
1º clasificado: Gabriel Guede Gómez, do IES Xesús Taboada Chivite (Verín).
2ª clasificada: Lúa Muíño rega, do IES Xoán Montes (Lugo).
3ª clasificada: Ariana Rodríguez Rivera, do IES Universidade Laboral (Ourense).
Accésit 4º ESO: Marcos Ferreiro Fírivida, do IES Castro de Baronceli (Verín).
Xeoloxía premiados e docentes / Concello de Monforte
