O Presidente da Deputación de Lugo, José Tomé Roca, explicou que os técnicos da Administración galega foron os que rexeitaron o proxecto para continuar esta vía ao tempo que lle contestou á bancada popular ao acusar ao Goberno provincial de non traballar por mellorar a rede viaria provincial. “Nós levamos arranxados moitos quilómetros de estradas, pero xa lles adianto que non se van facer quilómetros novos de estradas porque agora mesmo temos a maior rede de estradas do Estado con 4.400 quilómetros e o seu mantemento é moi difícil, os recursos son limitados”. Tomé insistiu en que a Xunta debería facerse coa titularidade de vías de comunicación principais que ten agora mesmo a Deputación, pois sería a solución para poder telas en mellor estado de conservación.

O Deputado de Promoción Económica e Social, Pablo Rivera Capón, asegurou que o PP “só fai un suma e segue, e continúa reclamando obras imposibles porque, neste caso, unha ampliación desta estrada suporía poñer en risco a pervivencia do noso patrimonio”, explicou, facendo referencia ao mosteiro de San Facundo de Ribas de Miño, en Paradela, que está catalogado como Ben de Interese Cultural. “Se lles preocupa o turismo e o desenvolvemento desta comarca poderían pedirlle á Xunta que desenvolva un plan de mellora desta comarca, con obras nas estradas que dean un servizo óptimo a estes concellos e ao turismo”, concluíu.