Interior Galego Vivo celebrou a súa VIª Asemblea no Casino de Chantada, á que acudiron representantes de todas as asembleas locais que conforman Interior Galego Vivo e na que participaron colectivos e persoas de candidaturas municipalistas de toda Galicia.
Por unanimidade refrendouse a proposta de artellar un acordo amplo sobre un programa común de defensa do rural e dos servizos públicos en todo o territorio que garanta que ningún voto se perde en Lugo ou Ourense para acadar o necesario cambio político en Galicia.
IGV considera que o momento é vital para poder dar prioridade ao territorio e acabar coas desigualdades, “o axustado resultado das diferentes eleccións esíxenos audacia e diálogo permanente con outras opcións que permitan artellar acordos amplos para avanzar en direitos e mellorar a calidade de vida das nosas poboacións”, aseguran.
Consideran desde IGV que as eleccións autonómicas e europeas son citas decisivas para o interior, “só desde a unidade de acción e formulando unha fronte cívica con tradución no plano eleitoral nas provincias de Lugo e Ourense pódese rachar coa hexemonía e a rede clientelar do PP; doutra banda. É urxente actuar no nível da UE que está ao servizo das grandes finanzas centroeuropeas e compromete o despregue de calquera alternativa que non pase pola desvalorización interna e o aumento do foxo da desigualdade”. Apostan por unha Europa de cooperación dos pobos que se asente na loita contra a mudanza climática dende unha perspectiva social e cívica e por unha internacional rural que leve a súa voz a todas as instituciós.
Interior Galego Vivo asegura que traballarán para tecer unha rede de alianzas, “desde a riqueza interna, a audacia, humildade e transversalidade, principios inspiradores desde sempre do tecido social das nosas parroquias. Porque máis rural e máis comunidade son necesarios para unha Humanidade mellor que aposte pola paz e a resolución pacífica dos conflitos.” Deste xeito, IGV coordinará con outros colectivos e candidaturas municipalistas das provincias atlánticas e dirixirase ás forzas políticas progresistas de Galicia.
