O delegado territorial da Xunta en Lugo, Javier Arias, reuniuse este venres con representantes da Agrupación de Interese Económico Ribeira Sacra, creada no ano 2023 co fin de promover intereses comúns para o sur da provincia e que agrupa ata o momento a máis de 60 iniciativas económicas de sectores como o viño a través das adegas, turismo rural, gastronomía, comercio, informática, avogacía, comunicación, calzado, servizos para o sector primario, enxeñería, cafeterías, hoteis, organización de actos, asesorías, educación, viaxes, atención sociosanitaria, ademais de polígonos industriais e colectivos como os centros comerciais urbanos ou asociacións empresariais de carácter municipal

O delegado aproveitou para informar das últimas convocatorias de axudas que están actualmente abertas, como as publicadas esta semana, Galicia Exporta Dixital, Galicia Exporta Empresas ou a de Galicia Exporta Organismos Intermedios, para a execución de accións de promoción exterior conxunta das empresas galegas. Tamén acompañaron ao delegado persoal do polo de emprendemento que a Xunta ten en Monforte e un consultor dos networkings que o Igape organiza por todo o territorio para incentivar a innovación.

Oviganic Ibérica visita Arias

Javier Arias visitou tamén visitou as instalacións de Oviganic Ibérica en Monforte de Lemos, onde destacou a aposta da empresa por xerar valor engadido ás producións das explotacións gandeiras da zona, en especial ás do sector lácteo. Coñeceu o resultado da ampliación desta entidade para implantar novas liñas de fabricación con leite de cabra e ovella, ademais do de vaca e reiterou a necesidade de seguir apostando polos procesos de transformación.

A visita a esta empresa que dá emprego a case un cento de traballadores, facíase coincidindo coa publicación no DOG da convocatoria de axudas da Consellería do Medio Rural para financiar investimentos en transformación e comercialización de produtos agrarios. O orzamento total é de 30 millóns de euros. 

O obxectivo destas axudas é incentivar os investimentos en activos fixos materiais para a creación, ampliación e modernización das instalacións situadas en Galicia destinadas á transformación e comercialización de produtos agrarios. O prazo de presentación de solicitudes para subvencións desta convocatoria será dun mes contado a partir deste luns.