A pancarta foi colocada nun lugar moi visible da “Carreira”, lugar central da saída do Oso “coa clara intención de aproveitar a gran concentración de persoas que xera este evento”, sinalan os nacionalistas e aseguran que o malestar de parte da veciñanza viña de días anteriores.
O pasado domingo tiña lugar unha nova edición do Teatro de Salcedo, unha das tradicións que a veciñanza conserva e transmite como parte dun Entroido Ancestral cuxa figura central é o Oso. Aseguran desde o BNG que o malestar deuse “cando se distribuiron instantáneas
en redes corporativas e persoais de membros do PP cunha pancarta da Xunta de Galicia
mimetizando as imaxes institucionais coas de campaña”.
“Preocúpanos que a utilización partidista do Oso poida prexudicar á propia celebración do Entroido de Salcedo, unha tradición que é de toda a veciñanza, independentemente da ideoloxía. Debemos ser coidadosos coas nosas tradicións e non mesturalas con intereses persoais ou políticos, é unha herdanza da vida comunitaria e como tal debe ser conservada. É moi perigoso patrimonializala só para unha parte, porque iso pode desmotivar a persoas implicadas na conservación deste Entroido, e tamén aos asistentes e ese dano vai moito
máis alá da política”, asegura, Rosa Ana Prieto Florines responsable comarcal da formación nacionalista. Dende o BNG lamentan a mala interpretación que se fai dalgo que é de todos e expresan o desexo de que non se repitan estes incidentes.