A prestixiosa zoqueira galega, Elena Ferro, visitará Quiroga para ofrecer unha charla na que destaque a súa traxectoria como muller emprendedora dándolle continuidade á marca familiar EFERRO e poñendo en valor o oficio tradicional dos zoqueiros.
Elena Ferro naceu en Merza, Vila de Cruces, en 1975. Herdou o oficio do seu avó, que inaugurou o obradoiro en 1915. Aprendera o oficio en Pazos (Silleda), facendo zocos a medida e indo casa por casa pola zona. En 1936 puxo en marcha a casa da familia en Merza, onde despois abriu o obradoiro que aínda hoxe se mantén. Gañaba a vida vendendo polas feiras, así puido criar os seus catro fillos. Dous deles –Agripina e Alfonso–, tía e pai de Elena repectivamente, continuaron o negocio.
A finais dos anos 70 deixaron de empregarse os zocos na zona. Asociábanse ao traballo no campo e ao atraso polo que a maioría dos zoqueiros desapareceron. O obradoiro de Ferro sobreviviu cando comezou a compaxinar a fabricación dos zocos coa marroquinaría. Elena sempre estivo atraída polo traballo e de nena pasou moitas horas observando no obradoiro. Sendo xa unha moza comezou a facer pulseiras e por fin exerceu a súa profesión actual. Hoxe Elena traslada os seus zocos ás páxinas das revistas de moda sen perder a esencia.
A actividade, organizada polo BNG de Quiroga enmárcase no contexto do 8M querendo visibilizar o binomino muller/emprendemento ademais da aposta polo rural para establecerse e impulsar proxectos.