Desde o PP destacan que a Ribeira Sacra conta con características propias e ben marcadas a nivel cultural, social, patrimonial -histórico e artístico- ou natural e estreitamente relacionado coa produción vitivinícola amparada pola Denominación de Orixe. Todas estas características fan da Ribeira Sacra un territorio cun destacado potencial turístico. Ademais, recentemente o Consello do Patrimonio Histórico Español acordou por unanimidade que a candidatura Paisaxe da auga: Ribeira Sacra sexa a proposta conxunta de España para a súa presentación ante a Unesco e optar así a ser recoñecida como Patrimonio Mundial.
O Partido Popular aposta por potenciar os recursos da Ribeira Sacra de forma conxunta e coordinada dende as administracións públicas. Nese sentido, os deputados do Grupo Provincial Popular defenden a elaboración e posta en marcha dun plan de impulso dende a Deputación de Lugo para potenciar os recursos propios da Ribeira Sacra e contribuíndo a dar solución aos retos actuais do sector turístico e vitivinícola en colaboración con outras administracións e que recolla apoios dende o punto de vista institucional, administrativo, económico e das infraestruturas públicas. A diversificación da actividade das adegas pode constituír unha boa solución e, neste caso, o enoturismo pode permitir xestionar e potenciar a riqueza do territorio; xa que a gastronomía e o viño son un elementos importantes á hora de explorar un destino turístico.
Dende o PP cren que “a Deputación Provincial ten un papel fundamental para poder afrontar estes retos, apoiando aos municipios da Ribeira Sacra, escoitando e dando solucións aos produtores e buscando apoios de todas as administracións afectadas como a Xunta de Galicia, o Goberno Central ou a Confederación Hidrográfica”. O portavoz, Antonio Ameijide, cre que “a Deputación non pode quedar unha vez máis sendo a única administración que non fai nada ao respecto dun proxecto vital como este para a provincia”.
Ameijide subliña que “dende a Deputación temos a obriga de ser o motor tractor que tire da provincia, que impulse os nosos territorios e que poña en valor e enxalce as súas bondades. Cando gobernamos esta institución traballabamos así e dende o Grupo Provincial imos a traballar arreo para que isto volva ser así”.
Os deputados do Partido Popular xa teñen reclamado ao goberno provincial a mellora das estradas titularidade da Deputación de Lugo para facilitar a comunicación de veciños e visitantes en condicións de seguridade, o acceso aos recursos naturais ou patrimoniais de interese turística e o desenvolvemento de iniciativas empresariais coas que cubrir a demanda de servizos e crear riqueza no territorio da Ribeira Sacra.
Así mesmo, demandan ao goberno da Deputación de Lugo máis implicación na promoción turística e apoio económico á vista de que nos orzamentos para o 2024 “conxelaron o investimento para información e promoción turística”.
XXIX Mostra de viños da Ribeira Sacra de Pantón
A conselleira do Medio Rural, María José Gómez, acompañada polo director xeral de Agricultura, Gandaría e Industrias Agroalimentarias, José Balseiros, e polo alcalde de Pantón, José Luis Álvarez, asistiu este sábado á XXIX Mostra de viños da Ribeira Sacra de Pantón.
Durante a visita, a conselleira puxo en valor este tipo de mostras como escaparate da calidade da despensa galega e máis concretamente dos viños desta denominación de orixe. Gómez reafirmou, ademais, o decidido apoio da Xunta a este tipo de certames e, en xeral, a todo o que ten que ver co fomento e promoción das producións alimentarias galegas de calidade diferenciada.
Conselleira Medio Rural XXIX Mostra de Viños da Ribeira Sacra de Pantón
