A riqueza paisaxística de Monforte atrae cada ano a milleiros de turistas desexosos de admirar a beleza natural do municipio e da Ribeira Sacra. Unha beleza que, segundo os populates, debe ser admirada desde os miradoiros habilitados para tal fin pero que, no caso de Monforte, non están “correctamente conservados”.
A voceira do PP de Monforte, Katy Varela, pon como exemplo o Miradoiro do Duque, “unha magnífica infraestrutura renovada no 2019, grazas á colaboración entre o Concello e a Xunta, converténdoo nun referente na Ribeira Sacra e nun dos puntos turístico máis importantes para o municipio”.
Pero, pese a súa importancia, “non existe unha limpeza axeitada desta infraestrutura, ademais de carecer de elementos esenciais como bancos, que quizá desaparecesen por vandalismo, e non foron repostos”.
Un éxito, o destas infraestruturas, que debería facer pensar ao goberno local en “apostar por contar con máis elementos coma este”. “Monforte é un municipio cunha riqueza paisaxística suficiente como para que se traballe na creación doutro miradoiro para que todos os turistas que chegan ao municipio poidan admirar a beleza natural dende diferentes puntos”, explicou.
