Lamentan desde Por Chantada que PP e PSOE “tombaran as propostas consensuadas co corpo de bombeiros” e que visaban trasladar ás instituciós competentes as demandas de persoal e material que son necesarias para facer fronte a emerxencias acuáticas neste ámbito.
Tratábase, segundo o grupo municipal Por Chantada, de “trasladar á Deputación de Lugo, á Dirección Xeral de Emerxencias e Interior dependente da Consellaría de Presidencia, Xustiza e Deportes da Xunta e ao Consorcio provincial de bombeiros, onde está Manuel Lorenzo Varela sen que serva para nada, unha serie de demandas consensuadas cos bombeiros urbanos”.
“Actualmente xa non é que haxa as mínimas garantías senón que os bombeiros vense impotentes sen un mínimo de material para actuaren en emerxencias acuáticas”, subliña Antom Fente, que engade: “é lamentábel que teñamos que seguir lamentando vítimas e sendo un territorio con servizos de quinta división cando pagamos impostos como o resto. Non queremos ser máis, mais tampouco menos ca ninguén”.
Consideran desde Por Chantada, “que é difícil de entender que non se atenderan as demandas que estaban consensuadas cos propios bombeiros” e lembran que “o tempo de resposta e a dotación de recursos e persoal suficientes son a diferenza entre a vida e a morte”.
“Salvar vidas e ter servizos públicos funcionais e eficientes é a prioridade máxima, por riba das verbedas ou das luces de Nadal que semella son a prioridade para cada vez máis alcaldes”, conclúen desde Por Chantada.
