Aseguran desde IGV que acollen con moita preocupación a situación que están vivindo as persoas viticulturas da Ribeira Sacra, xa que moitas adegas estanlles comunicando que non lles recollerán a uva, “mentres medran os ruxe-ruxe de medidas desde a Xunta que pasan por subvencionar a distribución e as grandes adegas deixando os produtores sen unha normativa clara que garanta a recollida e o pago a prezos dignos”.

“Non hai futuro para a Denominación de Orixe e a Ribeira Sacra sen fixar poboación e sen paisaxe de ribeira cultivada de viñedo e, sobre todo, sen as xentes que a constrúen, non hai Patrimonio da Humanidade, só un parque temático con algún enclave turístico. Para evitar o abandono de terras e o despoboamento da zona, precisamos facer sustentábeis as actividades económicas, como a viticultura”, sinalan desde IGV.

Segundo a formación política a crise actual é moi grave e pode durar varias campañas, con máis dun millón de quilos que poden quedar sen recoller e centos de viticultores e hectáreas que poden rematar desaparecendo; polo que piden a implicación dos alcalde para presionar á Xunta.

“Debería ser coa PAC e desde a Xunta que se contribuíse con axudas directas a quen manteña superficie traballada en muras ou bancais, pero no inmediato é necesario que se pague aos viticultores por cada quilo de uva que se vai tirar. As medidas que supostamente vai lanzar a Consellaría de Medio Rural pasan por subvencionar a distribución, algo que só vai empiorar a situación nas próximas campañas ao tempo que favorecerá a especulación e a distorsión do mercado polo lado da oferta”, apuntan desde IGV.

Consideran tamén que se deben adoptar con urxencia dúas medidas complementarias:

• Unha moratoria sobre novas plantacións ata polo menos 2027, suspendendo a Xunta as axudas a reestruturación de viñedo e substituíndoas por axudas para enxertar en verde e mudar a castes máis comerciais na demanda actual.
• Unha zonificación rigorosa por parte do Consello regulador en función das parcelas catastradas e non de ámbitos parroquiais moi heteroxéneos, delimitando con claridade que parcelas poden producir uva dentro da DO Ribeira Sacra e incrementando os controis.

Por último, consideran necesario aumentar as campañas de promoción, que deben incidir no local e no mercado galego e non ollar só para o exterior, e dispor dunha estación de vixilancia con avisos metereolóxicos e fitosanitarios.

Medidas de IGV para próximas campañas

• Axudas directas a colleiteiras e colleiteiros por manteren a paisaxe e o territorio vivos nunha viticulturaintensiva en mao de obra e de moi baixo redentemento. Estas axudas deberían facerse coa PAC e desde a Xunta, mentres que os concellos deberían estabelecer taxas turísticas en todo o xeodestino Ribeira Sacra para a mellora das infraestruturas.
• A Consellaría de Medio Rural debe elaborar estudos de custe por subzonas da Ribeira Sacra para trasladar ao MAPA e dar cumprimento á Lei da cadea alimentar.
• Poda en verde e baixar rendementos.
• Destilación de crise solicitada ao MAPA e á Comisión en prazo, xa que este ano si se autorizaron para Chequia, Austria e Portugal con cargo ao orzamento da PAC.
• Mellora da promoción, tamén orientada ao mercado galego, buscando a singularidade da DO Ribeira Sacra que non pode ser só sinónimo de mencía.
• Estabelecer unha estación de vixilancia con avisos meteorolóxicos e fitosanitarios.