Segundo os socialistas, a Casa do Concello, a Casa da Cultura e o antigo cuartel dispoñen de elevadores que nunca funcionaron. Nestes espazos sitúanse as aulas de informática, a biblioteca, o ximnasio, danse clases de pilates ou spinning, ademais do local para a terceira idade, empregado a diario polos maiores do Concello para actividades lúdicas e culturais. Os usuarios destes servizos foron os primeiros que demandaron estas melloras.

A voceira do PSOE en Taboada destaca que “que varios veciños con problemas de mobilidade non poden acceder a estes edificios e participar nas actividades, deteriorando a súa calidade de vida”. Piden os socialistas unha solución inmediata para que a veciñanza non teña que convivir con barreiras arquitectónicas que repercuten negativamente no seu día a día.

Segundo a voceira socialista é fundamental atender as demandas e necesidades das persoas en situación máis vulnerable, “para que poidan desenvolverse da forma máis independente posible e ter unha vida sociable”.